Anu kasaksén ku urang mah gebyarna, dina miéling proklamasi kamerdékaan saban Agustus téh. Malah anu karasa pisan téh lebah pangreuah-reuahna, lumangsung di saban RW, atawa copélna tingkat kalurahan. Kitu mun nangenan nu enggeus-enggeus, najan teuing bakal kumaha dina keur usum covid kieu mah.Padahal, éta peristiwa 75 taun ka tukang téh, saenyana lumangsung kalawan basajan pisan. Heueuh, da harita mah mémang kitu alamna.
Kitu deui lebah aweuhanana, tong disawang parat ka satungkebing wewengkon Nusantara, da alam harita mah pakakas komunikasina ogé walurat kénéh. Cindekna, tacan sakabéh rayat Indonésia apaleun yén dina poé Jumaah, 17 Agustus 1945 téh urang mimiti boga nagara anu merdéka. Cacak nu mangkuk sabudeureun Jakarta gé tacan tangtu kabéh apaleun.
“Di beberapa daerah, berita proklamasi yang disiarkan melalui radio morsecast itu menimbulkan berbagai keadaan. Ada di antaranya yang berani menyiarkan, dan ada pula yang ragu-ragu serta memasukkan berita proklamasi itu dalam lacinya untuk beberapa hari.”
Kitu panyaksén Mr. Iwa Kusuma Sumantri (lahir di Ciamis, 31 Mei 1899), dina buku anu disusun ku pribadina, Sejarah Revolusi Indonesia. Ieu tokoh Sunda anu ancrub kana pergerakan téh nuturkeun pisan kumaha gékgékanana proklamasi, ti mimiti tatahar pikeun ngarumuskeun dasar nagara tepi ka prungna ngumumkeun kamerdékaan. Iwa nyaksian langsung, waktu Bung Karno maca téks proklamasi hareupeun mikropun. Ditataan deuih, saha waé di antarana anu harita milu nungkulan di Pegangsaan Timur.
“… di kota-kota dan daerah-daerah kepulauan Indonesia lain yang pada waktu itu masih dikuasai oleh balatentara pendudukan Jepang, seperti di Sumatera dan kepulauan Indonesia lainnya, kabar proklamasi itu belumlah tersiar,” Iwa nambahan katerangan dina bukuna.
Mimiti walatra sumebar téh sanggeus nincak pertengahan Septémber 1945. Jadi, aya kana sabulanna kasidemna ogé. Dulur urang anu teu kahontal ku alat komunikasi (média massa) mah teu langsung arapaleun yén Republik Indonesia geus ngadeg.
Husus di Bandung, proklamasi diumumkeun 19 Agustus 1945. Cindekna, dua poé ti sanggeus lumangsung di Jakarta. Kitu katerangan ti Mashudi (lahir di Garut, 11 September 1920), mahasiswa THS (singgetan tina Technise Hoge School; ayeuna ITB), anu dina jaman pendudukan Jepang milu ngoordinasikan pamuda jeung mahasiswa Bandung pikeun tatahar mapag kamerdékaan.
Waktu proklamasi lumangsung, Mashudi keur aya di Jakarta. Peutingna, ber waé balik ka Bandung. “Esok harinya, tanggal 18 Agustus 1945, saya mengontak teman-teman dari grup Kebon Cau I. Lalu kami mengadakan pertemuan di rumah Sdr. Nasution, yaitu di gedung Bumi Putera yang terletak Jalan Lengkong Besar. Kami menyelenggarakan rapat semalam suntuk, serta menghasilkan gagasan yang akan segera diajukan kepada pemerintah pusat.”
Éta katerangan ditulis dina buku mémoar Mashudi, Memandu Sepanjang Masa, wedalan taun 1997.
“Saya dan beberapa teman mendatangi pemancar radio Hosukiokudi wilayah Tegallega. Pada malam itu juga kami merebut acara siaran dari orang Jepang, lalu kami menyanyikan lagu Indonesia Raya,” cék Mashudi dina mémoarna. “Selanjutnya kami mengerahkan para mahasiswa dan mereka yang bisa berbahasa Inggris, antara lain Artati Sudirjo, Imran, Tike, Mutirah, dan Ilen untuk menyiarkan proklamasi ke seluruh dunia, melalui siaran internasional yang pemancarnya terletak di Oude Hospitalweg (sekarang menjadi Jalan Lembong). Siaran-siaran dari tempat inilah yang dapat ditangkap di luar negeri untuk pertama kalinya.”
Mun Iwa jeung Mashudi aénal yakin kana gubragna alam merdéka, séjén deui pikeun Didi Kartasasmita mah.
“Pada suatu hari, dari corong radio saya mendengar berita bahwa Soekarno dan Hatta telah memproklamasikan kemerdekaan Republik Indonesia. Terus terang, saya sangat kaget. Betulkah berita ini? Jika ini benar, datangnya kemerdekaan begitu tiba-tiba, serta sama sekali di luar keyakinan saya. Apakah ini kegiatan nasional yang melibatkan rakyat banyak, atau cuma mewakili beberapa gelintir pemimpin (lebih tepatnya: tokoh politik) saja? Kalau saja peristiwa ini betul-betul merupakan kegiatan nasional, apa yang akan diperbuat setelah merdeka? Apakah bangsa Indonesia sudah siap menerima perubahan total ini? Kekuatan apa saja yang dapat diandalkan untuk menopang kemerdekaan, di luar kemauan politik?”
Saenyana teu béda ti Iwa, Didi ogé kaasup kana sérahna urang Sunda dina alam harita. Didi téh (lahir di Tasikmalaya, 20 November 1911) perwira munggaran di angkatan perang Hindia Walanda (istilahna KNIL), anu jolna ti sélér Sunda, lulusan Akademi Militer di Breda, Nagri Walanda. Karir militérna kaitung jero tur lega, lantaran kungsi mingpin pasukan dina Perang Dunya Kadua, di wewengkon Ambon.
Nilik kasang tukangna, mémang rada kaharti mun Didi teu ujug-ujug percaya yén nagara urang geus merdéka, ngawujud RI. Pamadeganana tangtu dumasar kana itungan kakuatan militér. Rék kumaha bisana merdéka, lamun teu boga tentara, bari infrastruktur kanagaraan tacan aya. Pamohalan, cék pamanggih Didi mah.
Pamadeganana robah sanggeus nangenan sikep rayat anu mimiti némbongkeun dukungan kana kamerdékaan. Rayat siap ngorbankeun naon waé ogé, utamana sanggeus Bung Karno pidato di Lapang Ikada, 19 September 1945.
“Saya datang ke Lapang Ikada sekitar satu jam sebelum Soekarno berpidato. Selama itu, orang terus berdatangan, tak ada habisnya. Dengan melihat kenyataan itu, keyakinan saya tambah lagi bahwa proklamasi telah menggerakkan rakyat banyak. Rakyat mau mendukung proklamasi; meskipun harus menghadapi resiko besar, yaitu teror orang Belanda dan Indo, serta ancaman dari tentara Jepang.”
Sanggeusna ngarasa yakin, kakara waé Didi singkil, milu paheuyeuk-heuyeuk leungeun jeung nu lian. Geus karuhan ari Iwa jeung Mashudi mah, ancrubna kana kamerdékaan téh leuwih awal batan Didi.
Luyu jeung kaahlianana, Iwa anu kaasup intelektual Sunda téh (ahli hukum, lulusan Universitas Leiden, Nagri Walanda, taun 1925) milu ngawewegan kabinet RI munggaran, jadi Menteri Sosial dan Perburuhan. Mashudi terus ancrub dina kagiatan Badan Keamanan Rakyat (BKR) anu jadi salah sahiji mata holang perlawanan fisik dina revolusi Indonesia, terus asup TNI tepi ka ngahontal pangkat Letjen, sarta kungsi dua rintakan jadi Gupernur Jawa Barat. Ari Didi, sanggeusna yakin yén RI téh enya-enya merdéka, sarua deuih terus ancrub kana perjuangan. Didi kaasup salah saurang tokoh nasional anu milu ngadegkeun jeung ngaorganisasikeun tentara.
Ngan nya kitu, ari dina diri jeung perjalanan hirup manusa téh aya nu disebut nasib. Iwa anu gedé jasana dina widang pamaréntahan jeung pendidikan téh (rektor munggaran Unpad), dina kanyataanana mah ngaranna kungsi rada tilem (atawa ditilemkeun?), tepi ka antukna kurang dipikawanoh ku generasi ayeuna. Kitu deui Didi, dina émprona mah bet ngalaman jadi “tumbal” révolusi, lantaran patelak pamadegan jeung nu nyekel kakawasaan.
Leupas tina kanyataan anu bieu didadarkeun, tina diri éta tilu tokoh anu geus almarhum téh nyampak sikep jeung tangtungan anu bisa jadi geus (rada) langka dipiboga ku para pamingpin jaman kiwari, nyaéta sual integritas jeung kajujuran.***